يعنى إيه فيس بوك ؟؟

يعنى تكتب انك عيان وهتموت ، وتلاقى الناس عاملالك لايك !

يعنى واحد معجب بيكى يرشأ على الوول عندك 24 ساعه يشوفك بتعلقى عند مين وبتضيفى مين وبيدرسك من اخلاقاك الفيس بوكيه، ويعد اصحابك الولاد.( يبقى يقابلنى لو عرف يوصل لحاجة)

يعنى صاحبك يعلقلك انتى قمر وعسووولة.. يروح العريس الجديد يطفش ويقول البنت مش ولابوود وليها أصحاب ولاد بيعاكسوا فيها وفوكك منها ياعم.

يعنى تنزلى صورة زى الزفت ليك ..وتلاقى قصايد الشعر والمنافقة هلت وتنسى نفسك وتفتكر براد بيت أو بريتنى سبيرز.

يعنى ايه فيس بوك ..؟




..يعنى تكتبى سينجل يقولوا مبروك ..تكتبى مخطوبة يقولوا مبروك ..تكتبى إن ريليشن يقولوا مبروووك وفى بالهم يقولوا بجاحه صحيح .. تكتبى اتجوزت ..محدش يعبرك.

يعنى تنزل أغنية عاطفية تلاقى الاشاعات انتشرت ويقولوا دخل قصة رومانسية، وتلاقى نص التعليقات ابتسامات وغمزات ..قال يعنى إنت فاهم !

يعنى تانى يوم تشير أغنية كئيبة يقولوا يا عينى إنفصل

يعنى تكتب استيتس انجليش ..محدش يفهم حاجة ويعملوا لايك قال فاهمين والسلام.

يعنى ايه فيس بوك ..؟

يعنى يحصل حالة وفاة ..يعنى تكتب ان فلان توفى .. تلاقى الناس بتعزيك على الوول وتعليقات ومحدش يعبرك بالتليفون ولا يجيلك عزا ولا البيت ..قال يعنى عملوا الواجب وخلاص.. وياسلام لو حد عمل لايك !!

يعنى واحد لسه خاطب جديد تلاقيه هايمان وطول الوقت عايش فى عيد.. وينزل أغانى لتامر حسنى وهما مالهم بينا يا ليل لهيثم سعيد، تروح ترد عليه هى بأغنية نانسى كل الى فات قبلك مش فاكراه ( الكدابة) وصور قلووب ورد أحمر قال يعنى مش عارفين الوكسة الى اتوكسوها وانهم راحوا فى الحديد.

يعنى تنفصلى عن واحد بتحبيه تلاقيه يسيح لأمك فى الاستيتس عنده وكاتب فيكى كلام سخيف مايغانهوش حتى أبو الليف، تردى انتى بسلامتك بأغنية سميرة سعيد أنا كتير عليك ، يروح يشيرلك أغنية ايه يعنى لما سبتينى ده حتى دمك مش خفيف وماضيكى مش لطيف.

يعنى ايه فيس بوك ..؟

يعنى ..أصحاب يخسروا بعض عشان هى كتبت تعليق مش لطيف وأحرجتها قدام صاحبها الجديد، وصاحبتك الى مش مستظرفاكى ومش طايقاكى تكتبلك اى لاف يوو وميس يوو يا بيبى.

يعنى واحد عامل فيها الواد المتدين ..وطول اليوم ترانيم وأيات ..والبنات تعلق وتقول يا سلام ادى الرجالة ولا بلاش.. " يا منافق )

يعنى فجأة ..الكل طلع فاهم فى السياسة وبيشارك فى الحملات الانسانية والتوعوية والاقتصادية والوقفات الحزبية.. حتى أنا )

يعنى ايه فيس بوك..؟

يعنى يعجبك ولد أمور عند صاحبتك الى بيعلق عندها كتير ومعجب، تروحى بسلامتك تضيفيه من وراها، وتكدبى وتقولى هو الى ضافنى .. .

يعنى تحط صورتك وانت على البحر ولابس الساعه السيتنييه او النضاره السينييه، تروح البنات تضيفك، وتقول الواد ده هيجيبلى شبكة سينييه... ماهى ماتعرفش الى فيها

يعنى جوزك يتخانق معاكى عشان الاستيتس بتاعتك فيها تلميحات انكم متخانقين وبتفضحيه، وانتى تتخانقى معاه عشان الاستيتس بتاعته فيها تلميحات بفراغة عينيه وان عنده ملل من الجوازه دى ! (صدقينى ياختى مش انتى بس..كلهم كده.)

يعنى ايه فيس بووك

يعنى تعمل جروبات كتير وصحوبيات كتير ، وتفتح الفيس من الشغل ، وتسيب شغلك وتركز مع الموزز الكتير.

يعنى تروح شغلك تقابل زمايلك .. أو يرن تليفونك وتلاقى بعد جملة صباح الخير ..بقولك ايه شوفتى الاستتيتااااس بتاعتى النهارده ؟ طب علق عليها !


منقول