.بينما سباك يجلس مع دكتور جامعي في قهوة بلدي جلسة ودية و حميمية .. دار بينهما الحوار التالي ..
-السباك : و الله يا دكتور العيشة بقت صعبة اوي .. كل حاجة فجأة غليت ..و الرزق على القد .. أنا مش بأعترض على قدر ربنا و رزقه.. بس بجد هي دي الحقيقة
-الدكتور : فعلا .. التضخم في العملة زاد بشكل ملحوظ..
-السباك : تضخم ايه يادكتور .. العملة لا تضخمت و لا حاجة .. ده بالعكس .. دي صغرت.. يعني أيام زمان أيام جدي و جدك كان الجنيه يشتري شئ و شويات.. كانت متضخم بصحيح.. اما دلوقتي بقى نونو على القد يا دوب
-الدكتور : هههه.. التضخم معناه ان القوة الشرائية للعملة تقل..
-السباك: دا احنا و الله اللي قوتنا الشرائية قلت مش العملة ..
-الدكتور : مجازا يعني يا عم
-السباك : تفتكر ايه الحل يا دكتور؟! .. نعمل ايه ؟! .. انا مش خايف على نفسي قد ما خايف على شباب مصر اللي لسة بيبدأ مستقبله
-الدكتور : يا واد انت يا وطني
-السباك : و الله يا دكتور هي المسألة مش وطنية و بس... المسألة هتعود عليا سواء دلوقتي او بعدين .. لما الشباب مش هيلاقي فلوس يتجوز مفيش بيوت جديدة هتتفتح و أنا بقى حالي يقف.. و السوق ما يبقاش واسع و يفضل زي ما هو و نتخانق كلنا على نصيبنا من الكحكة
-الدكتور: ما شاء الله .. محلل أقتصادي رائع
-السباك : أومال يا دوك .. دا أنا أعجبك أوي
-الدكتور : لو سمحت بلاش تقول لي يا دوك
-السباك : شكلك زعلت يا دكتور .. معلش أنا اسف.. أنا عارف أنك شايفني مش قد المقام و ما ينفعش آخد عليك
-الدكتور : يا اسطى ايه اللي انت بتقوله ده ؟ مش قد المقام ايه بس.. أنت على عيني و راسي من فوق ما أقدرش اقول عليك كده.. كل ما في الأمر اني مش بأحب حد يقول لي الكلمة دي حتى لو كان رئيس الجامعة بتاعتي شخصياً..
-السباك : و الله انا عارف انك بجد راجل اصيل و مش متكبر.. بس مش كل الناس زيك كده.. و مش عارف ليه يا دكتور دايما يقولوا انه فيه فرق بين السباك و الدكتور .. تفتكر فيه فرق زي ما بيقولوا
-الدكتور : ( ينظر له و يبتسم ابتسامة خفيفة و لا يرد )
-السباك: أنا عاوز أعرف مين أجدع من التاني .. يعني انت احسن مني و لا أنا لامؤاخذه احسن منك ؟!.. انا مش قصدي حاجة و حشة لا سمح الله بس نفسي أعرف مين الأحسن
-الدكتور : و الله أنا برضه زيك بأفكر في الفرق بين الاتنين...
أولا : أنا دكتور في كلية تربية نوعية .. و أنت سباك .. نظريا فيه فرق كبير .. و لكن هل الكلام ده فعلا صادق؟!
-السباك : أنت راجل على طول شغلك كله نضيف.. كتب و كراريس و اقلام و مكاتب.. أنا لامؤاخذة بأتعامل مع الحنفيات و المجاري و الصرف الصحي.. أكيد لما حد يفتكرك مش بيفتكر الا الكتب و الكراريس و . و .... و أنا بقى لما بيفتكروني بيفتكروا الحمام لامؤاخذة
-الدكتور: هههههه.. نظرتك يا اسطى سطحية .. خلينا نحاول نكون أكثر عمقاً في المقارنة ..
-السباك:ازاي؟!
-الدكتور: نبدأ مثلا بالنواحي المادية .. أنت مثلا معاك فلوس أكتر مني.. لأنك صنايعي و كسيب و الكل عارف كده
-السباك : ( علامات القلق على وجهه و يتمتم بصوت غير واضح بآيات قرأنية )
-الدكتور : هههه .. انت خفت و لا ايه يا اسطى.. انا مش بأحسدك و لا حاجة يا عم .. ربنا يزيد و يبارك .. أنا بس بأعمل مقارنة علمية .. أنا بحكم اني دكتور في كلية مش كبيرة زي تربية نوعية .. و ليس لي مصادر دخل برة الكلية فدخلي مقارنةً بدخلك محدود..فإنت كده أعلى مني مادياً.. يعني انت متفوق عليا بنقطة ..
-السباك : استغفر الله .. العين ما تعلاش عن الحاجب يا دكتور
-الدكتور: ما هو انت صحيح أعلى مني في دي .. إلا إني أعلى منك في حاجات تانية .. أنا أعرف أكتر منك من حيث الناحية العملية .. و ده مش غرور مني بقدر ما هي الحقيقة ..
-السباك : طبعا يا دكتور .. أمال أنت سموك دكتور ليه ؟!.. أنا يادوب بطيخة .. بس على فكرة أنا مش جاهل زي ما انت متصور.. أنا بأعرف أقرا و أكتب و كمان بأحب أطلع على آخر الاخبار في الدنيا ..سياسة و رياضة و كله يعني
-الدكتور : و ده شئ في صالحك .. إلا إنه لا ينفي جهلك بالكثير من الاشياء ..
( يخرج الدكتور ورقة و قلم من حقيبته .. و يضعهم على المنضدة و يقول) :
"أرسم لي خريطة مصر "
-السباك : و دي أعرفها منين لامؤاخذة .. أنا صحيح لفيت مصر من شرقها لغربها .. إلا إني ما شفتهاش من فوق !!
-الدكتور : هههههه.. على فكرة أي طفل في اعدادي هتلاقيه يعرف يرسم خريطة مصر كويس جدا كمان ... انت مش قلت لي انك خارج من الاعدادية في المدرسة ؟!
-السباك : ياااااه.. ده عمر تاني يا آبا.. هأفتكر ايه و لا ايه و لا ايه .. هو انا فاكر كلت ايه امبارح...
-الدكتور : يا عمي و لا يهمك .. مفيش حد عنده علم كامل.. يعني مثلا أنا مش بأعرف في السباكة .. و انت بتعرف فيها .. يعني انت عالم في علم السباكة ..هههه
-السباك : أومال.. دا أنا عالم و نص.. بس ما دمت انا عالم في السباكة .. يبقى عندي علم .. و انت بتقول اني علمي قليل .. ازاي تركب بقى ؟!
-الدكتور : أتفق معاك انك عندك علم في السباكة .. بس ده لا يمنع إنك مش واسع الاطلاع .. زيك مثلا زي طبيب بشري لا يفعل شئ الا قراءة كتب الطب و ممارسة الطب .. و لا يفقه حرف في مجال غير مجاله ... هو ايضا غير واسع الاطلاع.. و إن كان طبيباً.. مع الفارق ان علم الطب نفسه فيه معارف و علوم كتير غير السباكة .. بس الفكرة متقاربة كضرب لمثال ليس الا
-السباك : كلامك معقد.. بس مش مشكلة .. المهم دلوقتي.. فيه فروقات تانية ؟!
-الدكتور: ايوة .. المكانة الاجتماعية
-السباك :؟!
-الدكتور: يعني يا ترى مين فينا الناس بتحترمه اكتر من التاني ؟!
-السباك : حضرتك طبعاً..
-الدكتور : ده بس من ذوقك.. دي اجابة بديهية عند الكثير بس لا تفسر الموقف بعمق.. الأمور فيها امور..
يعني مثلا.. لو أنا و أنت دخلنا مطعم.. انت مع نفسك و انا مع نفسي.. و كل واحد قعد على ترابيزة.. أنت دفعت تبس كبير للجرسون عشان يظبطك في القعدة .. و أنا يادوب كان معايا اللي يكفيني آكل
الجرسون هيتعامل معاك بكل شياكة و كأنك رئيس جمهورية جه المحل.. أنا بقى يا دوب هيعاملني على قد الطلبات اللي طالبها .. ده ان ماعاملنيش ببرود
و نفس الكلام لو دخلنا لجزار .. انت مثلا معاك فلوس كتير و ربنا كارمك .. و ناوي تجيب لحمة كتير اوي تحطها في الديب فريزر .. أنا يادوب ناوي اجيب كيلو كندوز ..
لما تدخل انت و تطلب اللحمة الكتير دي .. هيجيب لك كرسي و يعمل لك شاي او يجيب لك حاجة ساقعة .. و طول الوقت ياباشا و يا بيه و يا لورد.. لحد ما تاخد اللحمة ...انا هيقلبني قوام قوام .. و يعاملني كأني مش موجود اصلا
-السباك : بس عدم المؤاخذة في الافلام و المسلسلات ساعات كتير يتريقوا على السباكين .. و لما يحبوا يشتموا حد يقولوا عليه انه سباك.. أما لو عاوزين يمدحوا في واحد يقولوا عليه دكتور
-الدكتور: ما هو الطابع الغالب ان الناس تحترمني اكثر .. و دي نقطة في صالحي.. بس زي ما قلت لك في بعض الاحيان انت بتحترم من قبل الناس اكتر مني..
يعني مثلا .. في مسألة الجواز ... كتير بنات ممكن تقضل سباك على دكتور لأنه جاهز مادياً..
-السباك : لا يا دكتور.. ما هو أنا مثلا لا يمكن أروح اتقدم لواحدة احس انها متعلمة اكتر مني .. أنا ما أرضهاش لنفسي . يبقى هي ازاي ترضاها لنفسها
-الدكتور : ما هو العملية لم تصبح شائعة بعد.. يعني صحيح انه صعب ان سباك يتجوز دكتورة .. بس صدقني عما قريب ستجد الدكتورة بترسم على السباك .. إحنا في ظروف ما يعلم بيها الا ربنا.. و المستقبل احتمال يبقى للي معاه فلوس و بس
-السباك : عارف يا دكتور لو حكاية ان الدكتورة ترسم على سباك حصلت .. دي تبقى حاجة آخر جمال.. يا سلاااام..
-الدكتور: توقع اي شئ في المستقبل يا اسطى..
-السباك : يعني كده مين احسن في عيون الناس؟!
-الدكتور : تقريبا زي بعض.. هتلاقي اللي يحترمني عشان علمي.. و هتلاقي اللي يحترمك عشان فلوسك .. و هتلاقي اللي تتجوزك عشان فلوسك .. و انا ممكن ألاقي اللي تتجوزني عشان نبوغي العلمي ...
-السباك : فيه حاجة تانية نقارن نفسها ببعض بيها ؟!
-الدكتور: الأهمية النسبية لكل واحد فينا .. بمعنى مين فينا أهم للمجتمع و البلد ؟!
-السباك : اكيد كل واحد فينا بيخدم في منطقته و بيفيد من حتة غير التاني.. انت بتعلم العيال .. و أنا بأصلح السباكة للناس
-الدكتور : عشان تقارن صح .. تسأل نفسك .. هيحصل ايه لو أختفى السباكين و الصنايعية .. و هيحصل ايه لو اختفى دكاترة الجامعة
-السباك : لو أختفى دكاترة الجامعة مش هيبقى في تعليم و لا جامعات
-الدكتور: و لا هيبقى فيه طبيب و لا مهندس و لا محاسب و لا محامي و لا قاضي و لا صحفي و لا .. و لا .. و لا.. .. مش هيبقى فيه بنية تحتية من الكوادر البشرية في المجتمع.. و هيبقى قائم على مجموعة من ذوي العقول الصغيرة – و لا مؤاخذة – اللي هيقودوا البلد لأن تكون متخلفة
-السباك :و لو مفيش سباكين و صنايعية الدكاترة مش هتعرف تعيش يا دكتور... ما هو برضه الدكتور عشان يعرف يعيش محتاج زبال يشيل له الزبالة.. و كناس يكنس له شارعه.. محتاج عسكري مرور ينظم له الطريق.. محتاج مطبعجي يطبع له الكتب.. محتاج سواق عشان المواصلات.. و ميكانيكي يصلح له العربية ..و سباك عشان لامؤاخذة الحمام.. لو مفيش كل دول الدكتور مش هيمارس الدكترة بتاعته .. اصلا هيقعد ازاي في الكلية من غير ما يكون فيه نجار بيعمل الكرسي و المكتب ؟!
-الدكتور : كلامك حكم يا اسطى .. كده تقريبا متعادلين في الاهمية ..
-السباك : يعني برضه في النهاية مين الاحسن ؟!
-الدكتور: و الله احنا تناقشنا في مجال المادة .. وطلعت انت متفوق.. يعني نقطة..و تناقشنا في مجال العلم و طلعت انا احسن .. و دي نقطة ليا.. يبقى 1-1
نيجي بقى للمكانة الاجتماعية .. قلنا اني انا ظاهريا افضل الا انك احيانا تتفوق من الباطن.. و عما قريب ربما تصبح انت الأول.. فدي عشان مش واضحة الملامح هنشيلها من الحسابات بالنقاط .. ولو عاوز نحطها يبقى انا تلات ارباع نقطة و انت ربع نقطة .. يعني انا متفوق عليك بربع نقطة
و قلنا الاهمية .. قلنا اننا تقريبا زي بعض في الاهمية .. يعني متعادلين... انا فارق عنك كده بربع نقطة.. ده لو حطينا في الحسبان نقاط المكانة الاجتماعية ..
-السباك : يا عمي ربع مش هيفرق كتير.. في بيتها يا دكتور.. انا نفسي الناس كلها تبص للسباك زيك.. انا حامل هم ولادي لما يكبروا انهم يستعروا من مهنة ابوهم.. اصلي ناوي أدخلهم كليات قمة ان شاء الله.. و مش هأخليهم صنايعية
- الدكتور: أتمنى ولادك لما يكبروا يفهموا ان ابوهم انسان في المجتمع مش قليل .. و ليه اهمية زيه زي الدكتور.. و لو ان الدكتور يفرق بربع ..ههههه
.. هي الساعة كام ( ينظر في ساعته) .. ياه .. انا لازم اروح عشان انام عندي بكرة كلية
-السباك : تعرف يا دكتور احلى حاجة في شغلانتي ايه .. اني مش لازم اصحى بدري.. مستقل اعمل اللي انا عاوزه
-الدكتور: هههههه.. و دي ميزة عندك.. تساوي ربع درجة ... كده نبقى زي بعض يا معلم.. سلام بقى عشان الحق انام
-السباك : سلام يا دوك
( تمت )
موضوع: السباك وصاحبه الدكتور 
